په تیروڅو ورځو کې د بارانونو او بیا ورسره د سیلابونو راوتلو له امله د سرپل ولایت کوهستانات ولسوالۍ په خوال سیمه کې همدا راز دبدخشان ولایت په ګنو ولسوالیو کې زموږ هیوادوالوته دسر اومال درانه زیانونه اوښتي دي.

د معلوماتو له مخې په سیلابونو کې له سلو زیات کورونه نړیدلي، په لسګونه زموږ ملکي هیوادوال چې ښځې او ماشومان هم په کې دي، یا يي خپل ژوند له لاسه ورکړی او یا ټپيان شوي دي.

موږ د دغو پيښو له امله له زیانمنو شوو کورنیو، خپلوانو او اړوندانو سره يې د زړه له تله خواخوږي ښيو او په دغه لوی مصیبت کې ځان ورسره شریک ګڼو.

موږ په سیمه کې داسلامی امارت له ټولو مسئولینو اومجاهدینو څخه غوښتنه کوو چې له هرې ممکنه لارې څخه د مصیبت ځپلو سره مرستې وکړي او ځانونه ور ورسوي.

همداراز موږ داسلامي امارت په نمایندګي په هیواد کې له ټولو تجارانو، سرمایدارانو، خیریه ټولنو او بشري نهادونو څخه غواړو چې په سرپل او بدخشان کې د یادو خلکو ستونزو ته رسیدګي وکړي او په دې ستر ناورین کې دخلکو لپاره دمرستو مواد او طبي پرسونل واستوي.

اسلامي امارت ټولو مرسته کونکو بې پرې خیریه ټولنو، مؤسساتو تجارانواو نورو مرسته کونکوته ډاډ ورکوي چې که دوی وغواړي سیمې ته لاړشي دمجاهدینو لخوا يي امنیت ساتل کیږي، هيڅ نوع تهدید او ستونزه به ورته نه وي او موږ ورسره همکاريو.

البته یادې ټولنې او جهتونه باید د ورتګ په وخت کې د اسلامي امارت د مؤسساتو د کمیسیون مسئولین او سیمیز مجاهدین په جریان کې کړي، ترڅو هغوی ورته, سیمې ته د ورتګ لارې چارې آسانه او ممکنه سهولتونه په پام کې ونیسي.

د افغانستان اسلامي امارت د ملکي تلفاتو دمخنیوي اداره