اشغالګر په خپل ناکام جګړییز سیاست بیا کتنه کوي؟!!

15-10-2015

---

د اونۍ تبصره /

له هغې ورځې (۷ اکتوبر ۲۰۰۱ز) چې اشغالګري امریکا زمونږ په ګران هېواد افغانستان تجاوز کړی دی څوارلس کاله او یوه اونۍ تېرېږي، د کرغیړن اشغال په دې اوږده موده کې زمونږ غیور، مسلمان او مجاهد ولس د دښمن د ظلم او وحشت په وړاندې په هر میدان کې مقاومت وکړ، مجاهدینو د الله جل جلاله په نصرت او بیا په خپل بې ساري صبر او پاخه تدبیر او د خپل ولس په مرسته د هغوی ټول پلانونه، استراتیژۍ او استعماري دسائس یوه په بله پسې خنثی او رسوا کړې، تېری کونکي یرغلګر د الله جل جلاله په فضل او د مقدس جهاد له برکته په نړۍ کې شرمنده او د بدې ماتې سره مخ شول، خو ډېر تعجب دی چې هغوی اوس یو ځل بیا د خپل بخت ازمایلو په تکل کې دي!!.

کله چې د ۱۳۹۴ لمریز کال د میزان په ۶مه نیټه د کندوز استراتیژیک ولایت مرکز د اسلامي امارت د مجاهدینو لخوا فتحه شو نو اشغالګري امریکا، ناټو او د هغوی ګوډاګیانو له هغې نیټې نه بیا بیا د اشغال د دوام او د اوږدې مودې لپاره د وحشي ځواکونو د پاتي کیدا په هکله څرګندونې پیل کړې دي، د امریکا د دفاع وزیر اشټون کارتر د (۸ اکتوبر ۲۰۱۵ز) په بروکسل کې د ناټو د دفاع وزیرانو په غونډه کې وویل: ” په افغانستان کې تر ۲۰۱۶ز کال وروسته د سرتېرو د پاتې کېدو په اړه د امریکا په ګډون یو شمیر هېوادونو ارزونې پیل کړې او تر ارزونې وروسته به پرېکړه کېږي” د جرمني د دفاع وزیرې او د ناټو عمومي منشي هم په نوموړي غونډه کې ديته ورته څرګندونې وکړې.

افغان ولس او مجاهدین لا له پخوا نه په دې باور و چې له ګران هیواد نه د دښمن د وتلو او د جګړې پایته رسولو تاریخونه ثابتې وعدې او رېښتونې ژمنې نه دي، بلکې دا د هغوی یو جګړییز تاکتیک او حربي استراتیژي ده، یوازې او یوازې د خپلو ولسونو او نړیوالو د غولولو او د اشغال په وړاندې د افغان ولس د کرکې او غوسې د ګراف راټیټولو په منظور یې وخت په وخت اعلانوي.

بل خوا د کابل اداره چې امریکا د واک په ګدۍ کښېنولې ده او په واک کې د پاتې کېدلو دنده یې هم د هغوی په غاړه ده هیڅ ولسي ملاتړ له ځان سره نه لري، حتی په هغو کسانو هم باور نه لري کوم چې د دوی سره کار کوي، د نوموړې ادارې چارواکي د افغاني شهامت او د اشغالګرو په وړاندې د افغانانو د اسلامي او ملي احساساتو درناوی هم نکوي، همدا وجه ده چې د اسلامي امارت نویو پرمختګونو دغه پر پردیو اوږو بار اداره وارخطا کړې ده، د مجاهدینو تر هر ګذار وروسته اشغالګرو ته د پاتي کېدلو او تر ډېرې مودې د اشغال د اوږدولو خواستونه او زارۍ کوي، د بېلګي په ډول د نوموړې ادارې تش په نامه اجرائیه رئیس د ملګرو ملتونو په وروستۍ عمومي غونډه کې وویل: ” .. زه باوري یم، چې امریکايي او افغان جنرالان دا مني، چې له ۲۰۱۶ز وروسته دې هم په افغانستان کې امریکايي سرتیري پاتې شي او دا ډېره اړینه خبره هم ده”.

اسلامي امارت باور لري چې د افغانستان مسئله یوازې نظامي حل نه لري، د ظلم، اشغال او تېري دوام د هیچا په ګټه نه دی، جګړه او زورګويي له ویرانۍ او د افغان ولس له ځورونې پرته بله ثمره نه لري، د جګړې اور مظلومان او ظالمان دواړه سوځوي، زمونږ په باور سالم فکر او عقل، عدالت او انسانیت ته رجوع د حل یوازینۍ لاره ده، اشغال د انساني فطرت او د یویشتمې پیړۍ د تمدن خلاف کرغیړن عمل دی، د قسم خوړلو ګوډاګیانو پرته په نړۍ کې هیڅ عاقل انسان او متمدن ولس یې منلو ته تیار نه دی، نو تر هرڅه وړاندې زمونږ معقولي غوښتنې باید ومنل شي: د هېواد اشغال ټول پایته ورسیږي، د افغانانو په خوښه اسلامي حکومت جوړ شي، د افغانستان په چارو کې د پردیو مداخلې بندې شي، مونږ آماده یو چې د جګړې د پایته رسولو په خاطر له ذیدخله لوریو سره جدي خبري وکړو، زمونږ په اند کله چې د اشغال د خاتمې او د بهرنیانو د انخلاء په اړوند د افغان ولس اطمنان حاصل شي بیا ان شاء الله العزیز د بین الافغاني تفاهم او دیالوګ په ذریعه د هېواد ټول مشکلات په اساني سره له منځه تللای شي. والله الموفق.